黎料啦！

話說放假之前，某人突然要求必須將手頭上幾個job要完成才可放假，包括完全未有落貨期既訂單，但既然她講到要攪掂至放人，咁亦唯有照做，於是開行庫“計“，連lunch time都咬住個包不停手做，亦打破放工不等一分鐘既原則，開足一個星期OT，晚晚八點幾至收工（對係呢間公司黎講，真係好夜架！），經過一番努力下，終於將某人要求既野，係放假前一日，交到佢手中，雖然換黎一句：下！ 你真係做等切呀？ 但我都真係打醒萬二分精神做架，事關有好多事，你成個人坐係度就無野發生，偏偏就係你一行開就黎料架，今次連埋星期六、日仲行開成六日咁耐，梗要打醒精神啦。

當放完假番工果日，一入office，以有人報料，萬事小心，即時心知不妙，但仍靜觀其變，前兩日終於黎料啦！

原來其中一個job幅圖既size出左問題，個客發晒老皮，send 晒e-mail過黎鬧晒，話佢地自己個designer以做對晒size芸芸，乜解我地公司個designer（我） 好無端端改佢架車Ｄsize，咁我就拿拿聲摷返Ｄ information，睇下係咪自己出事先啦，但我可以好肯定咁講句，我無錯，事關當日工程部交個呎吋比我時，我以提出自家人的size，同客人提供的確實係有出入，亦都上報工程部主管，上司（某人）同老闆，但佢地既回覆係照工程部size 做啦，因為有實辦在手嗎！ 而做貨亦是照實辦size，所以可照做，無問題的，咁佢地三方面都咁講，我當然照做啦，好可惜，咁就出事啦！

其實出事，對我黎講係無問題既，因為經常都有呢Ｄ問題出現，改返再向個客解釋番就OK，但今次無咁做，佢地第一個返應就係，Maggie好中意改客人Ｄ野，加上佢幹住放假，實係求其交Ｄ野出黎就算，仲同個客講：Since our Maggie is on holiday, I have asked our junior artwork coordinator in our factory to create the artwork. I think this is his 1st time making something for our customer. Please kindly review and advise whether they are acceptable.
而呢封e-mail亦破例咁CC左比我，當我睇到封mail，再加埋佢地講既內容，果刻真係好慶，當初係你地叫我錯都照做，家下出問題就搵我際旗，仲係我放左假，無得解釋，咁我即係硬食啦！
其實自從我生仔後，以收晒火，好多野都“good"聲吞左佢，但今次真係吞唔落，於是就拎晒Ｄ資料同佢地講，而今次我無入會議室講，而係企正係大廳，慕求全世界都要知發生咩事，唔好等Ｄ人私下估估下，再作故仔，而我亦作了最壞打算。

我將成件事既始末攤晒出黎講，亦重伸，我只是按各方主管指示辦事，包括某人，可解有問題發生後，只我一個要負責任，而你地亦同客人講有junior改番Ｄ問題，重要求客人見諒佢第一次做，多多包涵，如果係咁，我係咪唔需要再follow，如果係既話，OK! 我可以唔做，當我講到呢到，全部人靜晒，無人有返應，而我亦無再講落去，返番埋位打定信，預備心情平服番Ｄ就拎出去。

過左個幾中，我收到老闆電話，佢同我講：『其實成件事，基本上係工程部計錯了size，但佢唔知道，所以當收到客人mail時，亦唔知發生乜事，不過既然各主管都說無出錯時，你Maggie 係最細既，咁好自然就認為係你錯，而呢Ｄ亦係正常諗法，你亦應該理解，至於Junior既問題，亦只是你放左假，我係廠度搵個工程部既“靚“仔，將客人既野叫做改過下，拖延下時間，所以你係要follow番既，你明唔明白！明既話，咁我要同你講既野亦以講完，係咁啦。』

我明，完全明，當我生完第二個，羅埋產假我就會走，雖然仲未有。