上星期日去了澳門一日遊，對上一次去以是四年前，而今次因為有標叔叔鬼佬同事一齊去，就好豪咁搭直升機啦 （公數），我地選擇左回程搭直升機，去程搭船。
10:00am 去到澳門碼頭，第一站係去觀光搭，$70入場真係貴，雖然早前美人報料話消費滿 $100 (甜品自助餐) 就可免費上頂樓，但我地得一日時間，要留番個肚食其他野，所以都係比錢買飛，上到58/F，起初真係唔敢行去透明玻璃地板範圍，只敢伸個頭去睇下，唔睇還可，一睇真係心都離堆，真係..........好高呀！ 我即刻同標叔叔講好驚呀，再望下俊熹，問佢你睇唔睇下呀？ 呀仔答我話睇呀，我都好驚呀，不過Ｅ頭話驚，果頭就走左去塊玻璃地板度行黎行去，之後仲坐左係上面要我同佢影相，又係咁問典解睇到下面既，典解媽媽驚既，典解爸爸唔行出黎既（原來爸爸仲驚過我）.......典解典解........?
之後上到61/F 仲見到有個後生女玩笨豬跳，見佢毫不猶疑咁就跳左落去，真係後生可畏！
行多一陣之後，我去就去左大三巴，同四年前一樣，好多人，而氣亦好熱，行左一陣，就去左義順食薑汁撞奶，不過實在太熱，我地三個大人，最後叫左涼粉紅豆冰同辣魚包，而呀仔就話要食牛油面包，當鬼佬見到柸涼粉紅豆冰既黑色涼粉時，眼神極度疑惑，唔知食唔食好，當見標叔叔大口大口食時，又好唔好意思咁，食左一啖，之後係典，咪唔洗三分鐘，成柸食晒，仲棟起手指公話 real very good 囉!
食完冰，就過氹仔官也街行下，食下，買下，遊遊閒閒咁就以經五點幾，再返去行下魚人碼頭，就去搭直升機lu。
我地既重頭戲，而家至開始，去到碼頭櫃位check-in，真係同上機一樣，比機票劃位，過海關係行另外一邊，唔洗排隊，最正都係候機室，我地既dinner都係Ｅ度攪掂，好多野食，又有甜品.....最緊要係免費，真係唔錯，而係我地不停食野之際，出現左一段小插曲， 當時7:45pm班機發生故障，要延遲到8:15pm才可轉另一架直升機（每十五分鐘班），咁過左一陣，就傳黎一陣嘈吵聲，原來有四個講流利普通話既乘客係度鬧緊Ｄ地勤人員，話重乜要延遲，佢地係坐7:45pm班機，應該優先坐8:00pm班機飛，有乜理由要佢地遲走，返而坐8:00pm機既人可以走先，咁Ｄ地勤人員就好有禮貌咁向Ｅ四位乘客解釋，如果咁做就會影嚮晒7:45打後既全部航班.....云云，咁其實搭飛機都經常有咁既情形，航空公司都唔會為一班機，而影嚮到其他航班啦！但呢四位人兄就係咁嘈，最後航空公司好似唔知送左Ｄ咩比佢地，佢地至收聲，當大家以為一切攪掂之際，8:00pm起飛既乘客開始步出停機平既時候（即係我地），果四位人兄既其中兩個竟然跑過黎沖關，嚇得我地即時彈開，好彩Ｄ地勤又好眼明手快咁走去攔截喎，直情好似睇戲咁，呢個世界真係乜人都有。
而直得一讚既，就係在發生呢個情況時，另外一個職員即時部住我地行另一邊上機，重撩俊熹講野，分散佢注意力，等小朋友唔好驚，依樣真係抵讚。
擾攘一輪，直升機終於起飛啦，都無遲飛喎，啊！ 原來澳門既夜景都好靚喎，但由於航程太快(16 mins) ，掛住睇野，又要解答呀仔不停既提問，都影唔到相，十六鐘後以降落啦，過關又係唔需要排隊，好快咁就過左呢個星期日啦！
沒有留言:
發佈留言