驚訝！

噚日發生左一件令我十分十分十分十分驚訝既事，事源在奶奶家晚飯時，老爺突然同我地講（我，叔仔及叔仔老婆），話今日佢同俊熹同妹妹做左場好戲，你地估下係咩事！

老爺話佢今日帶妹妹去散步時，見仲有十五分鐘就要接俊熹，咁就無推妹妹返屋企，一齊係站頭等，但老爺話站頭大風，就留底妹妹同架BB車係一面馬路，自己就過對面馬路等校車，請留意，係留底個岩岩一歲多Ｄ既ＢＢ係街，自己一個過對面馬路，我地聽到Ｅ度，當堂呆左，我地三個人，第一個返應係，亞爺，點解你留底妹妹，自己行開，咁做非常危險，有咩意外點算，但老爺無答我地，繼續自己講，佢之後話，佢係對面馬路睇實，仲話有三個附近中學既學生妹撩妹妹玩，Ｄ學生妹仲周圍望，話點解唔見左ＢＢ個媽媽，老爺仲話見到佢地周圍望就好好笑，之後就又有個女仔行過，仲話Ｅ個女仔就最多事，唔係佢就乜事都無，佢話Ｅ個女仔同Ｄ學生妹見唔見左ＢＢ個媽咪，話不如報警，之後二話不說就報左警啦，而呢個時候俊熹既校巴亦都到左，老爺就拿拿聲抱俊熹過返呢面馬路，諗住推埋妹妹走，但幾個女仔攔住佢話都唔知佢係咪壞人，同埋差人黎緊，唔比走，而俊熹見有人攔住唔比佢地走時，就喊左出黎，咁妹妹見到哥哥喊又跟住喊，之後差人就到啦，老爺講到呢到，竟然仍然唔覺得有問題，仲係度話果個女仔多事，我實在忍唔住啦，我話老爺！ 如果係我，我都會報警，我點知你係咪真係ＢＢ個呀爺，你有咩證明，但呀老爺話佢係ＢＢ呀爺，洗咩證明呀。

而叔仔同叔仔老婆就話（叔仔老婆個樣係好嬲，我識佢咁耐，從未見過佢發火，但佢Ｅ刻個樣真係.....），點可以留底妹妹自己行開，有意外咁點，點知老爺話佢係對面馬路睇住，點會有事，叔仔地就話，有架車撞埋黎點算，有野狗行埋去點算，有人行過一手抱走佢點算，你點趕得切過黎，意外即係意料之外，預計唔到，你睇住又點，咁你不如話係屋企個窗口睇住，但呀老爺竟然發悔氣話，咁以後你地自己帶妹妹出街，我唔帶啦，咁我就話，我情願你唔好帶啦，呀老爺跟住唔同我地講，出左街。

佢出街後，我地就問奶奶，點解會咁，呀奶奶就ＥＥ哦哦，話佢下次唔會啦，佢都比差人話左啦，叔仔老婆終於都出聲，佢話如果差人執正黎做，一定去左差館，妹妹就一定無得即刻返屋企，起馬要係社會福利處住一個星期，要父母拎齊文件去證明，仲會比人“now" 餐懵，雖然好小真係會執正黎做，但真係會咁呀，之後老爺返黎，叔仔老婆一路都無採佢，連望都唔望佢，老爺又好似無事發生過咁。

我返屋企後，即刻打電話將Ｅ件事講比老公聽，問佢覺唔覺得有問題，佢話梗有問題，除左危險外，仲有態度問題，最大問題係老爺唔覺得有問題，老公話今個禮拜返黎，一定要好好同老爺講，而今朝姑仔都以經知件事，亦都話左佢，我估老爺其實都知自己唔岩，但就搵唔到下台楷，咁唯有死撐，希望佢真係明白佢Ｅ個行為係錯啦！