扭計

話說噚晚返奶奶到，一入屋見到呀仔訓係床到，心諗今日梗係無係校巴到訓下，所以返到屋企就訓左，老爺仲投訴話佢吾肯沖涼，吾肯食飯，吾肯飲湯，吾肯......... ，總之乜都吾肯，我望住亞仔，佢一泡眼淚咁，都吾之係眼水定眼淚，咁我就問俊熹，係咪好累呀，咁挨多陣，等埋叔叔嬸嬸返黎，我地一齊食飯好好呀？ 佢話好，仲講：『我挨多一陣就會精神啦。』 講完就坐起身，咁我咪去洗手同睇下佢本手冊，但亞老爺就話仲乜而家吾食，係要等埋同大人一齊食，到時又阻住晒......，跟住隻豬仔終於哇一聲喊出黎，本來以經攪掂，家下又要再攪過，呀奶奶終於忍吾住話，個孫又吾係吾食，你仲乜係都要整喊佢，佢同我地一齊食有乜問題，佢都未訓醒，梗係無胃口啦，你家下逼佢食都食吾落架啦，（yeh! 呀奶奶同我想法一樣）最後我同俊熹洗個面，扯開話題去睇一陣圖書，傾下計，咁之後咪醒晒，食左一大碗飯。

到差不多九點我就同俊熹講，你未沖涼喎，媽媽同你沖完至走啦，呢個時候，佢真係扭計啦，吾肯沖，又喊，我同佢講小朋友點可以吾沖涼架，我問佢點解吾沖呀，講比我聽啦，佢仲喊得大聲Ｄ，係咁大聲話，吾沖吾沖，今次我有Ｄ嬲啦 （但我吾可以發皮四），誰不知老爺竟然話由佢，呀老爺你係咪同我攪對抗呀，我話yes你話no，玩野咩，之但係呀奶奶又同我立場一至，話小朋友一定要乾淨，要沖涼，最後呀仔終於同我講，而家天咁黑，好凍呀，我吾想洗頭，啊.....咁今晚好快咁沖涼，明日至叫嫲嫲洗頭啦，下次要講比大人知，吾可以扭計呀，咁而家要講咩呀，跟住佢就同我地講對吾住，然後就擔櫈仔去厠所等我校水。

係今次呢件事，令我知道左兩樣野
（１） 對小朋友，吾係一味要鬧，吾好以為小朋友乜都吾識，好多事係可以同佢地講道理。
（２）我要同老爺好好溝通，做法要一至。


攪完一輪，返到屋企，竟然訓吾著，走去kitchen整左個pie